மரண தண்டனையை நிறுத்த குவைத்தில் கையெழுத்து இயக்கம்

குவைத்தில் அனைத்துத் தமிழ்ச் சங்கங்களின் பங்களிப்புடன், பேரறிவாளன், முருகன், சாந்தன் ஆகியோரின் தூக்குத்தண்டனையை இரத்து செய்து விடுதலை செய்யக்கோரும் கையெழுத்து இயக்கம் தொடங்கப்பட்டுள்ளது.

இராசீவ்காந்தி கொலைவழக்கில் குற்றஞ்சாட்டப்பட்டு, மரணதண்டனை விதிக்கப்பட்ட பேரறிவாளன், முருகன், சாந்தன் ஆகியோரின் கருணை மனுக்கள் அண்மையில் இந்திய சனாதிபதியால் நிராகரிக்கப்பட்ட அறிவிப்பு அனைத்து தமிழர்களின் மத்தியிலும் மனித உரிமை ஆர்வலர்கள் மத்தியிலும் பெரும் அதிர்ச்சியை ஏற்படுத்தியுள்ளது.

இதைத் தொடர்ந்து உலகெங்கும் மரணதண்டனைக்கு எதிரான குரல்களும், மரண தண்டனையை இரத்து செய்யக்கோரும் தீர்மானங்களும் நிறைவேற்றப்பட்டு வருவதோடு, இக்கருத்தினை வலியுறுத்தி இந்திய அரசிற்கு மனுக்கள் அனுப்பப்பட்டு வருகின்றன.

அந்த வகையில் குவைத் நாட்டில் வாழுகிற தமிழர்கள் ஒன்றிணைந்து, அனைத்துத் தமிழ் அமைப்புக்களின் பங்களிப்புடன், இந்திய சனாதிபதி, துணை சனாதிபதி, பிரதமர், உச்சநீதிமன்ற தலைமை நீதிபதி, உள்துறை அமைச்சர், மனித உரிமை மன்ற நீதிபதி, தமிழக ஆளுனர், தமிழக முதலமைச்சர் ஆகியோருக்கு மனு அனுப்ப ஏற்பாடுகள் நடைபெறுகின்றன. இம்மனுவில் குவைத்தில் வாழுகிற அனைவரிடமும் கையெழுத்து பெற்று அனுப்ப கையெழுத்து இயக்கம் தொடங்கப்பட்டுள்ளது.

இது குறித்த மேலதிக தகவல்களை, thamizhnadan@gmail.com என்ற மின்னஞ்சல் வழியாகவோ, 66852906 என்ற கைபேசி எண்ணிலோ தமிழ்நாடன் அவர்களைத் தொடர்புகொண்டு பெற்றுக்கொள்ளலாம்.

குவைத்வாழ் தமிழர்கள் அனைவரும் தமிழ்நாடனிடம் கையெழுத்துப் படிவத்தினைப் பெற்று கையெழுத்துக்களை சேகரித்து இந்த முயற்சிக்கு வலுசேர்க்க வேண்டுகிறோம்.